وبيتهموا الجزيرة ؟؟
بعد كل سنين التعتيم والظلام الإعلامي العربي طلت علينا هالة ضوئية اسمها الجزيرة ...
قديش عشنا ونحنا متخيليين إنو العالم بتنتهي حدودو الشمالية عند حلب وحدودو الجنوبية عند درعا ...
ومن عاليمين في تدمر و عاليسار في اللاذقية وطرطوس وبعدين البحر ...
بس ما كنا منتواخز ... بما إنو عنا القناة السورية وما منخفيكون سراً إنو كنا كتير نحب نتابعها ...
لأنو جد أحلى من أفلام الرعب .. خود عندك مثلاً برنامج الشرطة في خدمة الشعب يوم كان المذيع علاء الدين الأيوبي
يسألو للحرامي ( ندمان ولا مو ندمان ) ؟ ...
ويختملنا الحلقة بسؤال غريب ( طيب شو بتنصح كل الشباب اللي بيحاولوا يسلكوا نفس الطريق ) ؟
وكنا بس نروح عالنوم نشوف الحرامي بالمنام ..
طبعاً هالمذيع هاد بالذات ( علاء الدين الأيوبي ) كان يعلق عصلاة الجمعة وعمباريات كرة القدم والمناسبات الدينية .
ولا برنامج طلائع البعث تبع رواد القطر ..
اللي كنا ندرس ندرس ونجيب كل العلامات عشرات وما كنا نصير منهون .. أبصر ليش ؟؟
طبعاً لا يخلو التلفزيون السوري من الأفلام الهندية وساعة من الأحلام مع برنامج سحب اليانصيب
طبعاً وكل واحد معتر وفقير يتفرج على هالبرنامج ويشوف الناس كيف عم تربح . . .
وأحلى شي برنامج أرضنا خضراء ... مع إنو يعني شغلنا كلو بالزراعة بس ولا مرة طلع واحد منعرفو
يا سيدي المهم الزراعة شغالة والحمد لله !
كان الواحد بس يتابع برنامج الشرطة في خدمة الشعب يضلو عايش الأسبوع كلو عأعصابو خوفاً من هالحرامية وأصحاب السوابق لحتى الله يفرجا عليه ويطلع برنامج حماة الديار وفيه لقاءات مع القطاعات العسكرية المتنوعة واللي كانت تظهر دائما سرورها وسعادتها وجاهزيتها واستعداداتها للدفاع عن الوطن وشفنا هالشي بوضوح خلال هالأحداث هي الجديدة !
وفي برنامج ضوء على الأحداث ولو إنو كنا نتفرج عليه بدون فائدة لأنو كان يجيب الضوء على الحدث اللي صرلو شي أسبوع مارق والناس كلا دريت فيه .. بس كان لازم نشوفو لأنو ما عنا خيار تاني ...
الله يرحمو عدنان بوظو كنا نعرف طبعاً إنو الرياضة هيه نادي الجيش والوحدة والنصر والشرطة وما شابه ...
وضلينا عايشين بهالعتمة الإعلامية لبين ما سمعنا إنو جيرانا ركبوا ساتلايت وفي عندون قناة الجزيرة ...
من كترما نسمع الناس عم يحكوا بهالقناة فكرناها قناة للأفلام ...
لحتى إجا اليوم اللي صار عنا في قناة إسما الجزيرة ... طبعاً من يومها بطلنا نشوف خلقة ناهد عرق سوسي
ولا البرميل سلوى صبري اللي بس تستضيف دكتور ببرنامج طبي بتشرح أكتر منو وتحاول فرض وجهة نظرها بالطب باعتبارها على خبرة عريقة بتقديم البرامج الطبية اللي ما حدا استفاد منها شي ...
وخسرنا المعلق الرياضي ( الزميل إياد )
و الأستاذ ( جوزيف بشور ) طبعاً هالمذيع كان وهوعم يعلق عالمباراة ومطرت الدنيه كان يترك التعليق ويجيبلنا النشرة الجوية ..
ومرة كانت طيارة عم تطير حوالي الملعب فترك التعليق وصار يقول اقتربت الطائرة
ابتعدت .. اقتربت وتبتعد وهدف ! طبعاً نحن في الدقائق الأخيرة من بداية المباراة .
وبطلنا نسمع أغاني وإهداءات أم عمار ...
ودرات الأيام و بلشنا نسمع عن المظاهرات اللي بسوريا فاضطرينا نرجع للقناة السورية لنشوف شو القصة
ولقينا المذيعيين الجداد ... صراحة ما بعرف أسمائهون منيح بس عسبيل المثال
هالشب الزريف
وهاد قال بيحل مشاكل الشباب بس انا عملي عقدة نفسية مدري ليش ؟
وهالبنت العصبية بس جئرة شوي
واتعرفنا عشخصيات كرتونية رائعة ومحببة لدى الأطفال
كالمربع الأستاذ خالد العبود
وأبو نص لسان بسام أبو عبدالله
والطبل الغني عن التعريف . طالب ابراهيم
بس المفاجأة إنو اتعرفنا عليهون مو عالقناة السورية ؟؟؟ عقناة الجزيرة !!!
لأنو بشوفون بيتصلوا عقناة الجزيرة وبيبهدلوا وبيعيطوا وبدون ياها توقف بث ؟؟
بس ما فهمت ... ليش ؟؟ من يوم يومها الجزيرة بتنقل كل أخبار العالم وما حدا اعتدا عليها ؟؟؟
أبصر ؟؟ في مشكلة بينون وبين قناة الجزيرة بس ماني فهمانا ! ...
قررت اتفرج عقناة العربية وقلت خلي الواحد يريح راسو .. بس المفاجأة إني غيرت عن الجزيرة
لأني كرهان وقاحة خالد العبود قام طلعلي عالعربية طالب ابراهيم وهو عم يقول ( الجيش العربي السوري ) ...
كمان نفس الحالة ؟؟
طيب هالقنوات للخليج و النظام عم يتهم الخليج بالتحريض علينا معناتا ما ضللنا غير القنوات الأوروبية
المعربة ... متل البي بي سي العربية ... فتحت عليها ليطلعلي بسام أبو عبدالله أبو نص لسان وهو عم يقول للمذيعة ( هناك مؤاموة ) ؟؟
طيب وبعدين ؟؟ يعني أنا مضطر شوف قناة الفشل ( السورية ) اللي بتكزب بالنشرة الجوية أو قناة رامي مخلوف ( الدنيا ) اللي كانت للمسلسلات وبيوم وليلة صارت أخبارية فجأة ؟؟ ولا مضطر شوف قناة الجماهيرية اللي ماصرلا يومين فاتحة ولسا ما عندون خبرة ؟
من مين بدي صدق ؟؟ بعد ما فكرت ..... وصلت لنتيجة ... طيب ليش عم يهجموا عالجزيرة ؟
إذا اللي عم يتصل من الشعب واحد شاهد عيان واللي عم يتصل يرد عليه واحد من النظام يعني التنين
سوريين ؟؟ والفيديو اللي عم ينعرض مو الجزيرة اللي صورتو هادا تصوير موبايلات الناس بسوريا ؟؟
والخبر اللي عم يجي عم ينقلوه عن حقوقيين وعن وكالات أنباء عالمية ؟؟
طيب شو دخل الجزيرة ؟؟؟ يعني لا كاميرة الجزيرة صورت شي ولا مراسل الجزيرة جابلنا خبر
ولا الجزيرة عطت رأيها ولا إلها دخل بشي !! هنن عم ينقلوا الفيديوهات اللي عم توصلون
وعم ياخدوا شهادات العيان من المتصلين وعم ياخدوا الرد من أبواق النظام يعني بالمختصر
الفيديو سوري وشاهد العيان سوري وبوق النظام سوري والحقوقي سوري والمعارض سوري معناتا
هيه بس وسيلة نقل بين السوريين ومالها دخل بشي ..
طيب ليش السوريين محتاجين حدا يوصلون ببعض ؟ عندون قنوات وعندون إعلام ؟؟
ليش شاهد العيان ما بيتصل عالقناة السورية ؟ ليش بوق النظام ما بيبهدل المذيعة السورية ؟؟
ليش القنوات السورية بتعرض وفاة تنين جنود وما عرضت ولا واحد من الـ 1500 واحد اللي ماتوا ؟؟
معناتا إزا الإعلام السوري حكومي وفاشل وقناة الجزيرة حرة وبتنقل الحقيقة أنا برأيي يزبطوا
الإعلام السوري بدل ما يتصلوا ويعووا عقناة الجزيرة والعربية والبي بي سي وغيرون ...
وبيقتلوا وبيعملوا اللي بدون ياه و بيقلولك الجزيرة السبب ؟؟
طيب ليش بتتهموا الجزيرة ؟؟ شو دخلها ؟؟؟؟؟؟؟؟؟؟؟؟؟؟؟؟
No comments:
Post a Comment